كفاحي هاهاهاها

قعدت برشا نخمم قبل منحل المدونة هذي خاطر أنا بخلي و بايعها بلفتة بطبيعتي أما حسيت بروحي باش نطرشق خاطر ما لقيت حد باش نحكي معاه خاطر عايشين في سوسيتي ماترحمشي و زيد فما فكرة ماخذينها عل الملحدين إلي هوما مهبلة و ماهومشي نورمال و يحكيو بالفلسفة برشا و فاشلين اجتماعيا و مصطكين و ماخذين شوك في حياتهم و مطردين من ديارهم إلخ إلخ ٍِِِْْْْْ دونك باش نكتب أول مرة نحب نوري إلي أنا شاب تونسي عايش نورمال كيما الشباب الكل لا نتبع سياسة و مايهمنيش فيها نكره الفلسفة و الحكايات المعقدة مغروم بالكووووورة و الإنترنت و الموسيقى و برشا حاجات توا كل مرة تعرفوا حكاية أيا خليوني نحكيلكم كيفاش وصلت للإلحاد متاعي و كيما يقول عنوان لرتيكل كفاحي وقتلي كان عمري 8 سنين تغرمت بالدين و بديت نصلي برشا ملحدين قريتلهم يقلك نشأت في عائلة متدينة أنا العائلة اللي عشت فيها لاهي لاهي بابا و أمي ماكانوش يصليو و ماكانوش فاسدبن زادا بالعكس رباوني بلقدا بلقدا مفما في الأنتوراج متاعي يصلي وقتها كان ماماتي و بالطبيعة ماعندهاش حتى ثقافة دينية و لا تعرف لا تقرى لا تكتب الحاصيلو تعلمت الصلاة كي قراوهانا في المكتب و من وقتها بدات علاقتي مع الدين بديت نقرا في القرآن و نقرا في الكتب الدينية وقتها كان عندي نهم للقراية موش نورمال و أي حكاية اطيح في يدي كنت نقراها بديت نثقف في روحي في برشا دومانات و من بين الدومانات اللي عرفت فيهم برشا حاجات هو الدين بديت نحفظ في القرآن وقتلي عمري 10 سنين و الحاجة اللي نحب نأكد عليها اللي أنا نعمل في الحكايات هذوما وحدي وحدي ماشجعني حتا واحد بالعكس بابا وقتها قلي سيب عليك مازلت صغير اتلهى بقرايتك أما كنت نصحح راسي و مانسعموش و زيد كنت قراي بطبيعتي يعني الوقت كان يكفي باش نقرى و نلعب و نطالع هههه وقتها لافما لابارابول لا أورديناتور لا انترنت في البريود هذاكا كانت فما سؤالات تجيني في بالي كي كنت نقرى عالجنة و النار و كنت و قتها نخمم شمعناها خلود في الجنة و زعمة مانفدش كي نقعد مليار سنة مفماش مغامرات مفماش دراما مفماش سيسبانس و بعد نستغفر و نقول الشيطان يحب يبعدني عالدين حتاكشي جاتني أول صدمة دينية في حياتي وقتها عمري 11 سنة قريت كتاب متاع كارل ساغان هذايا عالم في النازا اسم الكتاب كوكب الأرض نقطة زرقاء باهتة بون لكتاب علمي و يحكي على مستقبل الإنسان في الفضاء أما الحاجة اللي صدمتني اللي هوا ميلول حكا كيفاش الإنسان تطور كيف بعد على الكنيسة اللي تقول الأرض مسطحة و الشمس تدور على الأرض و الدنيا تعملت في ستة أيام الحقيقة هوا ماجبدش الإسلام أما أنا كنت نعرف اللي لحكايات هذي موجودة في القرآن و تشوكيت وقتها خاطر أول مرة نشوف واحد يجبد الدين بالطريقة هذيكا و يقول اللي هو غالط وزيد وليت مبعد مركز برشا مع الأغلاط العلمية متاع القرآن بون وقتها ماكنتش نقول أغلاط و كنت ديما نستغفر و نقول ياخي واحد عمرو 11 سنة باش يفيق بالقرآن فيه أغلاط و مليار مسلمين اللكلهم مافاق فيهم حد هذيكا الحجة اللي كنت نسكت بيها روحي و في البيريود هذاكا جاتني فترة تدين صحيحة تنجم تقول رياكسيون للشكوك اللي كانت تجيني اما ديما نخمم في حكايات كيما "و الشمس تجري لمستقر لها" و كيفاش آدم يعرف الأسماء كلها و الإنسان البدائي ما يعرفش الكتابة و النار أما مستحيل وقتها كان باش نخمم اللي يجي نهار و نولي ملحد و نكتب الكلام هذا الحاصيلو كل ما تجيني شكوك كنت نسكتها بون عرفت برشا متدينين وقتها و نقول لازم إيماني موش صحيح شبيهم هوما ما تجيهمش شكوك كيفي و الحاجة اللي نحب نقولها اللي أنا في أقوى فترات التدين متاعي ماوصلتش لاكا التدين المتشدد بالعكس كنت نحب الإسلام و نقول اللي هو دين متفتح و يحب الحياة و العلم و الحضارة و تعلمت نرد على الشبهات اللي تقول الإسلام دين وحشي انتشر بحد السيف والا الإسلام اظطهد المرأة و كان في بالي اللي الملحدين ماهمش فاهمين الإسلام بيلقدا الحاصيلو وقتلي وصلت 15 سنة بدا التدين ينقص وقتها بديت في توب المراهقة و حتة صوحابي اللي نعرفهم متدينين بدا التدين متاعهم ينقص وليت نصلي ماجمعة للجمعة و ساعة ساعة يجيني تأنيب ضميرنصلي شويا و بعد نبطل بون فما مرة سمعت مناظرة بين أحمد ديدات و قسيس اسمو سواغارت الحاجة اللي شدتني و دفنتها لداخل و ما حبيتش نخرجها اللي أنا حسيت اللي الزوز عندهم الحق الحاصيلو من 15ال 20 سنة تبدلت برشا كنت معروف متدين و عاقل و ليت ماشي و نولي سلعة كيما نقولو سيرتو في القراية كنت أكا التلميذ النجيب وليت ماعاش عاطي أمبورطانس للقراية و الدين و وليت ماركة هملة و في العشرين سنة نسيت دراكيفاش طحت بسيت الملحدون العرب أول مرة قريتو ماحبيتش نركز معاه بالعكس رجعت نصلي و نسيت لحكاية شهر والا شهرين حتاكشي كيف كيف بالصدفة نطيح بالمدونة متاع عياش مالمرسى وقتها كانت الضربة القاضية لقيت برشا حاجات اللي كنت نشك فيهم فما شكون كيفي شك فيهم و زيد فيقني ببااااااارشا حاجات أخرييين كيما التطور الهفوات متاع القرآن اللي الرسول ماهوش بالقدسية اللي كنت نراه بيها و بعد نزيد نطيح بأرض الرمال بون وقتها مازلت في مرحلة اكتشاف الإلحاد و ماكنتش متقبل لحكاية بسهولة اما الحجج كانت أقوى مني إببرشا و مالقيت لا أنا و لا ردود المسلمين عليها مقنعة و كانت بداية فترة جديدة في حياتي نحكيلكم عليها المرة الجاية تشاااااااااووووووووووووووو